今日終於考完FPE, 七個鐘，做到想死～不過好多都做唔晒，唉，都唔知pass唔pass到，真係唔希望十二月要retake，到時會仲慘呀，沒晒study leave and annual leave，點溫呀～～

　　星期一要返工呀，六個星期的假期完呀，唔想返工～

   今日自己一個人上深圳client office做search for，好彩個客都幾合作，所以都幾順利，六點幾鍾做完野，不過班船七點九先開，所以離開office,去左永和食野,牛肉面＋小籠包＋豆漿，唔錯～～～

　明日又要返去之前果隻job做埋ｄ野,有點擔心明日做唔晒,但是點都要搞掂佢呀，因為隻job要pull out！唉，呢隻job都幾辛苦，我見到個女仔A2做到喊,都唔知講咩好，唯有做好自己本份啦！今次已經係我第二次見到同事做到喊啦,仲有見到自己同期的A1做左呢份工後．瘦左十幾磅，心都有點寒，自己堅持做落去值唔值得呢？？？

　　放左兩日假，都係屋企訓覺，一次過訓個夠！今日係屋企睇左兩齣戲，＜World Trade Center> 同埋<The Devil Wears Prada>, 兩齣都好好睇！

　　睇左＜World Trade Center>,大災難中人與人之間生離及死別的場面令人動容，雖然都係一貫災難片的煽情手法，但是每次睇都會被感動！

　　＜The Devils Wears Prada>,好佩服女主角可以堅持追求自己的理想，雖然曾經一度為追求潮流及名牌而工作，但最後仍然可以重拾做記者的理想！

剛剛過去的星期五，六,日上左褔建，返自己老家STOCKTAKE, 都有點興奮！

星期五下午一落機就即刻去client's 的貨倉點貨，到了八點幾鍾先點完，隻腳行左三個幾鍾都有點酸．點完貨，個客請我去左間酒樓食海鮮，晚餐都幾豐富！之後我同其他同事講我去食海鮮，佢地都好羡慕，因為只係我點的呢間廠先咁好，我其他同事去其他工廠點，都只係職員飯堂食大鑊飯呀！

星期六又係點貨，早上點的果個貨倉都幾整齊，所以都唔係好難點，而且個貨倉主管讚我地點得好認真，自己辛苦的付出，得到別人的認同，都幾開心！下午我同其他兩位同事到另外一個貨倉點，一去到我地三個人都呆左，個貨倉好似個廢墟，貨物放得亂七八糟，而且又係密封的，又熱又焗，我地成班人都覺得呢度唔做貨倉，可以用來做WAR GAME場地，因為唔駛點裝修，都已經完全有種在廢墟中打仗的感覺．

經過一日的辛勞，夜晚大家返到酒店沖完涼，就出去行下，睇下酒店附近有咩野玩．我地見到有間建築物，上面有個保齡球樽，就諗住去碌lane，點知去到先知係間夜總會，出面仲有塊牌，寫住禁止十八歲以下人仕進入，一睇就知唔係正經場所，所以最後我地去左隔離果間足浴按摩．

今個星期有三日都係訓得三，四個鍾，星期六都要返工，OT到十二點先走人．唔知係唔係太累，搭錯巴士，搞到成個幾鍾先返到屋企．

今日星期六原本約左班朋友食飯，點知做唔晒野冇得走，上次燊燊去越南做野，原本約左食飯，但係又要OT,最後去唔到，仲有應承左KWAN去睇BAND SHOW, 不過要返大陸出JOB,最後又是甩底，估唔到自己而家變成飛機王，專放人飛機！

前晚同個friend傾左個幾鍾電話，我話好想辭職，好大壓力，覺得好辛苦．我個friend有句話，我好受落，就係點解人地捱到，你唔得呢？我諗一直以來我的性格就係比較容易放棄，唔夠堅持的人，所以聽完佢話，我決定捱落去．既然決定繼續做，再辛苦，都唔好再呻，始終係我自己揀的！雖然而家唔知自己呢個決定係唔係對的，不過只能盡力做好啦！